Booking.com

Booking.com

Favorite Links

Monday, January 16, 2017

潘啓才:細公司上市為啤殼

http://www.mpfinance.com/fin/columnist2.php?col=1463481140709&node=1483385722094&issue=20170103
文章日期:2017年1月3日

【明報專訊】在過去一兩年,證監會及港交所經常公開提及要打擊「啤殼」活動,但對於細市值的公司搞IPO,如果唔係諗住「啤殼」,根本無乜理由要搞上市,我為何會咁講,讓我慢慢解釋。

上市費隨時多過集資額

首先,在香港股票市場,我們要知道細市值公司上市,根本唔會有長線投資者願意投資,所以要找真正投資者買入新上市公司股票,是非常困難的一件事,所以把幾億市值的公司上市,希望利用上市公司作為集資平台,根本係發緊夢!此外,上市費用也非常昂貴,創業板超過2000萬元,主板要成4000萬元,如果上市為了集幾千萬,根本就係「攞呢搞」,因為找完上市費用條數,根本就無乜錢落袋,所以上市唔係為咗獲得一隻3億的創仔殼或6.5億的主板殼,唔通為咗集一二千萬而去付出幾千萬元。

由於以上原因,假設你用3年時間開創了一檔今年賺3000萬元、預計明年會賺5000萬元、後年有機會賺成1億元的生意,你今年會唔會搞上市?如果檔生意係我嘅,當然我唔會搞,點解?第一、如果我花大量精力去搞上市,肯定會對我這盤咁有爆炸力的生意有影響,與其搞上市,不如多花精神搞好檔生意;第二、我檔生意既然咁賺錢,我肯定唔等錢使,咁我點解使幾千萬去為咗最終集資一二千萬元。第三、我檔生意預計有咁高增長,有咁好世界在前面,我點解要攞25%股份同啲「三唔識七」的公眾股民分享。總的來說,如果我知道自己檔生意好得,我根本諗唔到有乜理由要搞上市。

「啤殼」上市難有客觀定義

所以,如果我有檔小生意,又夠數上市,我會考慮上市的原因只有一個,就係檔生意叫做死好命,做到今日叫做夠數上市,但我深知再做落去,應該未必會有咁好景,既然這刻有個咁好嘅機會,真係唔上就笨,如果又咁啱有人主動搵我,話出埋錢幫我搞上市,當上市成功後,才同我分錢,咁我算唔算搞「啤殼」上市。

又假設我口袋有錢,檔生意又真係夠數及業務性質都符合上市要求,同時我覺得做上市公司大股東及主席真係好鬼有型有款,雖然我真係無諗過上市後立刻賣殼,但因為殼價咁貴,揸住隻殼真係型過揸住架超跑好多倍,如果我因為咁諗而去搞上市,咁我算唔算「啤殼」?

最後假設我無咁好彩,雖然我檔生意聽落好有前景,生意亦做到有唔錯利潤,但如果想搞上市,條數就未夠,碰巧有人接觸我,好鍾意我檔生意,願意出錢出力,幫我搞大檔生意,同埋搵有搞上市經驗的會計師,同我檔生意執靚盤數去搞上市,咁我又算唔算搞「啤殼」上市?

老闆搞上市 業務往往已見頂

以上三種隨意模擬的情景,其實我想搞上市的原因,都因為我睇中殼價,就算我上市目的不是想立刻賣殼,但如果沒有高昂的殼價這個重要因素,我肯定未必會投入心機、時間及金錢去搞上市。但同時我亦好肯定,如果我真係有盤盈利高速增長的生意,我肯定唔會急急腳去搞上市,就算要搞,都會等到檔生意做到增長已差不多見頂才會去搞上市。

此之所以,幾億市值的IPO公司,如果創辦人唔係諗住啤殼即刻賣或者遲啲賣,我真係諗唔通點解要上市。

www.phemey.com

[潘啓才 通天財技]

No comments:

Post a Comment